როგორ შევამციროთ გათბობა-გაგრილების ხარჯები ქვაბამბის დახმარებით

როდესაც ნებისმიერი სივრცის და თუნდაც, საკუთარი ბინის რემონტს ვგეგმავთ, ხშირად პირველ რიგში ვიზუალური დეტალები გვახსენდება: როგორ ფერზე შეიღებოს კედლები, რომელი იატაკი ჯობს, როგორი შპალერი ან ფილა უფრო ელეგანტურია. თუმცა ის, რაც თვალით არ ჩანს, ხშირად გაცილებით მეტს განსაზღვრავს: თბოიზოლაცია ერთ-ერთი ყველაზე მნიშვნელოვანი ფაქტორია, რომელიც პირდაპირ ზეგავლენას ახდენს მაცხოვრებლების კომფორტზე, ენერგოეფექტურობასა და ხარჯებზე.

გათბობა-გაგრილების ხარჯები საქართველოში, განსაკუთრებით თბილისში, ყოველწლიურად მზარდია. ზამთარში-სიცივე, ზაფხულში-40 გრადუსი ტემპერატურა, გადახურებული კედლები და მჭიდრო სივრცე. თუმცა, გამოსავალი არსებობს და ის საკმაოდ მარტივია - სახლისთვის ხარისხიანი თერმოიზოლაციის უზრუნველყოფა ქვაბამბით.

ქვაბამბა თანამედროვე ტიპის, საიმედო და მრავალფუნქციური მასალაა, რომელიც მნიშვნელოვნად აუმჯობესებს შენობის თერმულ და აკუსტიკურ თვისებებს. მისი დახმარებით შესაძლებელია გათბობასა და გაგრილებაზე დახარჯული ენერგიის 60-65%-მდე შემცირება,რაც პირდაპირ აისახება როგორც კომუნალურ გადასახადებზე, ისე ეკოლოგიურ მდგომარეობაზე.

ამ ბლოგში დეტალურად განვიხილავთ მის მახასიათებლებს, თვისებებს, დადებით და უარყოფით მხარეებს, იმასაც მოგიყვებით, რატომ უნდა იყოს რემონტის განუყოფელი ნაწილი ნებისმიერი სივრცისთვის.

რისთვის გამოიყენება ქვაბამბა?

ქვის მაღალ ტემპერატურაზე გადამუშავების შედეგად წარმოქმნილი ლავისებრი მასა, რომლის დაძენძვის შემდეგ ბამბასავით ფაფუკი ქსოვილი მიიღება - სწორედ ესაა ქვაბამბა. მისი განსაკუთრებული სტრუქტურა და ქიმიური თვისებები საშუალებას აძლევს იმუშაოს როგორც თბოიზოლაციის, ისე ხმის შემაკავებელ მასალად.

ქვაბამბა აქტიურად გამოიყენება როგორც ახალაშენებულ შენობებში, ისე რემონტის ან უბრალოდ სახლის განახლების პროცესში. მისი გამოყენება შესაძლებელია:

შენობის გარე ფასადის თბოიზოლაციისთვის (როკფასადი სისტემით)
შიდა კედლების თბოიზოლაციისთვის;
სახურავის ან სარდაფის თბოიზოლაციისთვის;
იატაკის თბოსაიზოლაციო ფენისთვის;
ხმაურის შემაკავებლად.

ქვაბამბის დამონტაჟება მნიშვნელოვნად ამცირებს ენერგიისდაკარგვას და ქმნის კომფორტულ შიდა სივრცეს ნებისმიერ სეზონზე.

ქვაბამბის უპირატესობები

ენერგოეფექტურობა: ქვაბამბით იზოლირებული შენობა 60-65%-ით ამცირებს გათბობა-გაგრილების ხარჯებს;
ხანძარსაწინააღმდეგო თვისებები: არ იწვის, არ არის აალებადი და არ გამოყოფს კვამლს. იდეალურია ნებისმიერი სახლის უსაფრთხოებისთვის;
ნესტგამძლე: არის ტენმედეგი, შთანთქავს ტენიანობას და ინარჩუნებს თვისებებს წლების განმავლობაში;
ხმის იზოლაცია: ამცირებს ქუჩის ხმაურს საცხოვრებელ სივრცეში, რაც საკმაოდ დიდი უპირატესობაა განსაკუთრებით, თუ მრავალბინიან საცხოვრებელ სივრცეში ცხოვრობთ;
მასალა არ არის მიდრეკილი ობის, სოკოს და მღრღნელების გაჩენისკენ.
ორთქლგამტარობა: ბუნებრივი ვენტილაციის წყალობით, ყველა ოთახში ჯანსაღი ჰაერი და გარემოა.

როგორ მოვუაროთ ქვაბამბას რემონტის შემდეგ?

ქვაბამბა ერთ-ერთი გამძლე და პრაქტიკული მასალაა, რომელიც განსაკუთრებულ მოვლას ნაკლებად საჭიროებს. თუმცა, მისი ეფექტურობისა და ხანგრძლივად გამოყენების უზრუნველსაყოფად, რამდენიმე მნიშვნელოვანი რეკომენდაციის დაცვა აუცილებელია.

არ დატოვოთ ღია

ქვაბამბა არასდროს უნდა დარჩეს ღიად. ის აუცილებლად უნდა იყოს დაფარული, მაგალითად, გიფსოკარდონის ფირფიტით, პანელებით ან სხვა მასალით. ეს იცავს მას მექანიკური დაზიანებისგან და წყლის მოხვედრისგან.

უზრუნველყავით ჰაერის ცირკულაცია

ქვაბამბას აქვს მაღალი ორთქლგამტარობა, რაც ნიშნავს, რომ მას შეუძლია "სუნთქვა". ამიტომ მნიშვნელოვანია, რომ ოთახში ნორმალური ვენტილაცია არსებობდეს, რათა არ დაგროვდეს ზედმეტი ტენი, რაც შესაძლოა, გავლენას ახდენდეს შენობის სხვა ნაწილების ფუნქციონირებაზე.

მოარიდეთ ხანგრძლივ ნესტს

მიუხედავად იმისა, რომ ქვაბამბა ნესტგამძლეა, თუ მისი დამცავი ფენა დაზიანდა ან არასწორად დამონტაჟდა, ხანგრძლივი კონტაქტი წყალსა და ნესტთან მასში პრობლემებს გამოიწვევს. აუცილებლად შეამოწმეთ წელიწადში ერთხელ ფასადის ან შიდა კედლების მდგომარეობა.

დაზიანების შემთხვევაში იმოქმედეთ დროულად
თუ შენიშნეთ, რომ ქვაბამბის დამცავი შრე დაზიანებულია, ან კედელი შესწორებებს ან გალესვას საჭიროებს, ნუ დააყოვნებთ. დროული რემონტი (პატარა დეტალების აღდგენა) თავიდან აგაცილებთ ზედმეტ თავის ტკივილს, მასშტაბურ ზიანს და ფუნქციონალის მოშლას.
არ საჭიროებს სპეციფიკურ წმენდას რადგან ქვაბამბა გადაფარულია სხვა მასალით, პირდაპირ მოვლას არ საჭიროებს. საკმარისია შენარჩუნდეს დამცავი ფენა სუფთად და არ დაზიანდეს.

შეამოწმე შენი სახლის თბოიზოლაცია მარტივი გზით

ქვაბამბით თბოიზოლაციის დამონტაჟება მხოლოდ დასაწყისია. იმისთვის, რომ მას წლების განმავლობაში გააჩნდეს სითბოს შენარჩუნების უნარი, რეკომენდებულია, პერიოდულად მის მდგომარეობაზე დაკვირვება.

აი რამდენიმე მარტივი რჩევა, როგორ შეგიძლიათ გადაამოწმოთ თბოიზოლაციის ეფექტურობა სახლში, სპეციალისტის გამოძახების გარეშეც:

გაისინჯე კედლები სხვადასხვა ამინდში: ზამთარში თუ კედლები ცივია, ხოლო ზაფხულში ზედმეტად ცხელდება, შესაძლოა იზოლაცია სუსტად მუშაობს.
დაკვირდი ობის ან ტენის გაჩენას კუთხეებში - ცუდად დათბუნებული კედლები ხშირად კონდენსაციას აჩენს.
მოისმინე, საიდან მოდის ხმაური: თბოიზოლაცია ხმაურის შემაკავებელიცაა. თუ საგრძნობლად მოიმატა გარედან შემოსულმა ხმაურმა, შეიძლება ფასადი დაზიანებულია.
შეამოწმე კომუნალური ხარჯები: თუ გრძელვადიანად მატულობს გათბობის ან კონდიცირებისთვის საჭირო ელექტროენერგიის მოხმარება,ესეც თბოიზოლაციის ეფექტურობის შემცირების ნიშნად მიიჩნევა.

საერთო ჯამში, ქვაბამბა ბევრად მეტია, ვიდრე თბოიზოლაციისთვის განკუთვნილი მასალა. ფაქტობრივად, საუკეთესო არჩევანია ადამიანებისთვის, რომლებიც ფიქრობენ კომფორტზე, ენერგოეფექტურობასა და ხარჯების გრძელვადიან შემცირებაზე. სწორად დამონტაჟებული და მოვლილი ქვაბამბა იცავს შენობას სიცივისა და სიცხისგან, ამცირებს კომუნალურ ხარჯებს, აუმჯობესებს აკუსტიკას და ქმნის უსაფრთხო საცხოვრებელ გარემოს.