ყველაფერი, რაც გათბობის ქვაბზე უნდა იცოდეთ

გათბობის ქვაბი ნებისმიერი საცხოვრებელი ან კომერციული შენობის კომფორტულადფუნქციონირებისთვისყველაზე მნიშვნელოვანი კომპონენტია. მისი სწორად შერჩევა, მონტაჟი და მოვლა არა მხოლოდ ენერგოეფექტურობას უზრუნველყოფს, არამედ უსაფრთხოებას და ხანგრძლივ მუშაობას.

გათბობის ქვაბის შერჩევა კი ერთ-ერთი ყველაზე საპასუხისმგებლო გადაწყვეტილებაა, რადგან იგი წლების განმავლობაში განსაზღვრავს თქვენს კომფორტსა და დანახარჯებს. სწორი მიდგომით შესაძლებელია, მნიშვნელოვნად შევამციროთ ენერგიის ღირებულება და უზრუნველვყოთ სანდო გათბობის სისტემა. ამ ბლოგში ყველა რჩევას გაგიზიარებთ, რომელიც გათბობის ქვაბის შერჩევისას გამოგადგებათ.

გათბობის ქვაბების ტიპები

თანამედროვე ბაზარზე გათბობის ქვაბების მრავალფეროვანი არჩევანია, ყველა მათგანს თავისი უნიკალური მახასიათებლები და ფასი აქვს.

გაზის ქვაბები

გაზის ქვაბები ყველაზე გავრცელებული და პოპულარულია არამხოლოდ საქართველოში, არამედ მთელ მსოფლიოში. მოწყობილობა იყენებს ბუნებრივ გაზს წყლის გასაცხელებლად და გამოირჩევა მაღალი ეფექტურობითა და შედარებით დაბალი ექსპლუატაციის ხარჯით.

გაზის ქვაბების მთავარი უპირატესობა მათ ეკონომიურობაშია: მნიშვნელოვნად ამცირებს გათბობის ხარჯებს. ქვაბებს როგორც წესი, კომპაქტური ზომის მრავალფეროვანი დიზაინი აქვს, რაც მომხმარებელს საშუალებას აძლევს, პატარა სივრცეებშიც ადვილად დაამონტაჟოს.

ამ ტიპის გათბობის მთავარი ნაკლი ისაა, რომ ფუნქციონირებისთვის მოწყობილობას გაზის მიწოდების საჭიროება აქვს. საქართველოში კი ბევრ ადგილზე, განსაკუთრებით სოფლებსა და მთიან რაიონებში გაზი ყველგან შეყვანილი არ არის. ასევე საჭიროა რეგულარული ტექნიკური შემოწმება და შესაბამისი უსაფრთხოების ზომების დაცვა.

დიზელზე მომუშავე გათბობის ქვაბი

დიზელზე მომუშავე გათბობის ქვაბი წარმოადგენს შესანიშნავ ალტერნატივას იმ ადგილებში, სადაც გაზის შეყვანილი არაა, თანაც, გამოირჩევა მაღალი სიმძლავრით და ფუნქციონირებით.

დიზელის ქვაბები განსაკუთრებით ეფექტურია დიდი ფართობის სივრცეების გასათბობად. თანამედროვე მოდელები აღჭურვილია ავტომატური რეგულირების სისტემით, რომელიც წვის პროცესს მართავს.

მაღალ სიმძლავრესთან ერთად, ქვაბს აქვს შესაძლებლობა იმუშაოს ნებისმიერ კლიმატურ პირობებში.

რაც შეეხება უარყოფით მხარეებს, მათი ღირებულება შედარებით მაღალია ბუნებრივ აირზე მომუშავე ქვაბებთან შედარებით და საჭიროა რეგულარული შევსება. ასევე, მოითხოვს უფრო ხშირ ტექნიკურ შემოწმებას.

ელექტრო ქვაბები

ელექტრო ქვაბი, როგორც წესი, უზრუნველყოფს ენერგოეფექტურ გათბობას და ცხელი წყლით მომარაგებას. ელექტრო ქვაბზე შესაძლებელია დაერთდეს მოცულობითი თბომცვლელი ცხელი წყლის მისაღებად, რომლის მართვაც პირდაპირ ქვაბიდანაა შესაძლებელი.

მისი ძირითადი უპირატესობაა მარტივი მონტაჟი - არ საჭიროებს რთული სავენტილაციო სისტემის მოწყობას ან საწვავის შენახვის ადგილს. თანაც, ისინი ბუნებრივ აირზე მომუშავე ქვაბებთან შედარებით, აბსოლუტურად უსაფრთხოა. გარდა ამისა, მუშაობენ ხმაურის გარეშე და არ საჭიროებენ რეგულარულ ტექნიკურ მომსახურებას.

მთავარი მინუსი მაღალი ექსპლუატაციის ხარჯებია, განსაკუთრებით იმ რეგიონებში, სადაც ელექტროენერგია ძვირია. ასევე შეზღუდული სიმძლავრე დიდი ფართობის გასათბობად.

პელეტური ქვაბები

პელეტური ქვაბები ინოვაციურ და ეკოლოგიურ გათბობის მეთოდს წარმოადგენს: იყენებენ ბიომასურ პელეტებს - პრესული ორგანული მასალისგან დამზადებულ გრანულებს.

პელეტური ქვაბების ყველაზე დიდი უპირატესობაა ეკოლოგიურობა. ბიომასური პელეტები განახლებადი რესურსებისგანაა წარმოებული - მათი წვისას მინიმალური რაოდენობის მავნე ნივთიერებები გამოიყოფა. თანამედროვე პელეტური ქვაბები აღჭურვილია ავტომატური დატვირთვისა და გაშვების სისტემით და უზრუნველყოფს ერთგვაროვან ტემპერატურას.

როგორ დავამონტაჟოთ გათბობის ქვაბი?

ქვაბის მონტაჟი მნიშვნელოვანი პროცესია, რომელიც მხოლოდ კვალიფიციური სპეციალისტების მიერ უნდა შესრულდეს. არასწორად დამონტაჟებულმა ქვაბმა შესაძლოა, თქვენი სიცოცხლე საფრთხეში ჩააგდოს.

მონტაჟამდე ერთ-ერთი ყველაზე მნიშვნელოვანი ნაწილია, გათბობის სისტემის დეტალური პროექტირება. სპეციალისტები როგორც წესი, შენობის თერმულ მოთხოვნილებს იანგარიშებენ, რაც შენობის ფართს, ჭერის სიმაღლეს, ფანჯრებისა და კარების რაოდენობას მოიცავს, ასევე, კედლების იზოლაციას და სივრცის კლიმატურ პირობებს.

პროექტირების ეტაპზე განისაზღვრება გათბობის სისტემის ტოპოლოგია - მილსადენების განლაგება, რადიატორების მდებარეობა, ცირკულაციის ტუმბოების მოთავსება. მნიშვნელოვანია, გათვალისწინოთ შენობის არქიტექტურული თავისებურებებიც.

მონტაჟის ძირითადი ეტაპები

ქვაბის მოთავსებისთვის საჭიროა შესაფერისი ადგილის არჩევა: უნდა იყოს ხელმისაწვდომი ტექნიკური მომსახურებისთვის, მაგრამ ამავდროულად იზოლირებულიც. საჭიროა, ვენტილაცია და წყლის წყაროსთან სიახლოვე.

ქვაბის შეერთება მთავარ მილსადენებთან ზუსტ მუშაობას და დეტალურ აღწერას მოითხოვს. ამიტომ აუცილებელია, ეს საქმე პროფესიონალს მიანდოთ.

როგორ გავიგოთ, ეფექტურად მუშაობს თუ არა?

წნევის ტესტი - მონტაჟის დასრულების შემდეგ, სისტემა წნევის ტესტს გადის, რომელიც ყველა შეერთების ჰერმეტულობას ამოწმებს.

ფუნქციონალური ტესტირება - სისტემის ჩართვის შემდეგ, პროფესიონალები ამოწმებენ რამდენად სწორად მუშაობს თითოეული კომპონენტი - ქვაბი, ტემპერატურის რეგულაცია, უსაფრთხოების სისტემების ფუნქციონირება და სხვ.

გარანტია - მონტაჟის დასრულების შემდეგ საჭიროა შესაბამისი ვადის მქონე გარანტიის მიღება, ამიტომ, გაითვალისწინეთ, რომ კომპანიისგან ან მაღაზიისგან, რომლისგანაც ყიდულობთ, დოკუმენტი აუცილებლად უნდა მიიღოთ.

როგორ მოვუაროთ გათბობის ქვაბს

გათბობის ქვაბის რეგულარული და სწორი მოვლა მისი გრძელვადიანი და ეფექტური მუშაობის გარანტიაა. ასე, შეგვიძლია, მნიშვნელოვნად გავზარდოთ ქვაბის “სიცოცხლის და მუშაობის” ხანგრძლივობა.

წელიწადში ერთხელ, სასურველია ზამთრის სეზონის დაწყებამდე, პროფესიონალი, რომელიც ქვაბის ზოგად მდგომარეობას შეამოწმებს. ეს მოიცავს ყველა კომპონენტის ვიზუალურ შემოწმებას, კაბელების გამართულად მუშაობაზე დაკვირვებას, ელექტრონული სისტემების ფუნქციონირებაზე ყურადღების გამახვილებას.

ბუნებრივ აირსა და დიზელზე მომუშავე ქვაბებისთვის, წვის კამერის რეგულარული გაწმენდა კრიტიკულად მნიშვნელოვანია. დროის განმავლობაში დაგროვებული იქნება ნაღვენთი და ნარჩენები, რაც გათბობის ქვაბის ეფექტურობას ამცირებს და შესაძლოა, ყოველდღიურ ცხოვრებაში საფრთხეც შეგიქმნათ.

ასევე, წელიწადში ერთხელ სასურველია, სისტემის სრული კვლევა - ძველი წყლის ჩანაცვლება ახალით და გაწმენდა დაგროვილი მინერალებისა და ჭუჭყისგან.