ორთქლის უთო გაგიფუჭდათ? გიზიარებთ შეკეთების მარტივ ხერხებს

ორთქლის უთო ყველა ოჯახში საჭირო და გამოსადეგი ნივთია, რომელიც ყოველდღიურ, რუტინულ დღეებს საგრძნობლად ამარტივებს. იმისთვის, რომ ჩვენს საჭიროებებზე მორგებული და ხარისხიანი მოდელი შევარჩიოთ, აუცილებელია, ტიპები და მახასიათებლები საბაზისო დონეზე მაინც ვიცოდეთ. ამ ბლოგში გაგიზიარებთ ყველა საჭირო ინფორმაციას და რამდენიმე მარტივ ხერხს, რა უნდა ქნათ, თუ ორთქლის უთო გაგიფუჭდათ.
სანამ შეკეთების მარტივ ხერხებზე გადავალთ, მნიშვნელოვანია ვიცოდეთ, რა ტიპის უთოსთან გვაქვს საქმე.
სტანდარტული ორთქლის უთო
ყველაზე გავრცელებული მოდელია, რომელსაც წყლის რეზერვუარი კორპუსში აქვს ჩადგმული, გამოყენებისას წყალი ცხელდება და ორთქლის სახით გამოდის უთოს ძირში არსებული “ნახვრეტებიდან”, მათი შეკეთება შედარებით მარტივია და თანაც, ასეთი უთო ბევრად უფრო ბიუჯეტურია.
ძირითადი მახასიათებლები:
- ჩაშენებული წყლის რეზერვუარი (100-400 მლ მოცულობით)
- სიმძლავრე: 1400-2800 ვატი
- წონა: 1-1.8 კგ
- ორთქლის გამოყოფის ინტენსივობა: 10-50 გ/წთ
სტანდარტული უთო რამდენიმე ნაწილისგან შედგება:
- გამაცხელებელი ელემენტი - პასუხისმგებელიაგაცხელებაზე;
- თერმოსტატი - აკონტროლებსტემპერატურასდართავს/თიშავს გამაცხელებელსსაჭიროების შემთხვევაში;
- ორთქლის სარქველი - არეგულირებსორთქლისგამოყოფას;
- რეზერვუარი - წყლის შესანახიავზი, რომელიც ხშირად გამჭვირვალეა;
- ძირი - შესაძლოა, დამზადებული იყოს სხვადასხვამასალისგან (ალუმინი, კერამიკადა სხვ)
უპირატესობები:
- ხელმისაწვდომი ფასი
- მარტივი კონსტრუქცია
- შედარებით ადვილია შეკეთება
- კომპაქტური ზომა
უარყოფითი მხარეები:
- ორთქლის შეზღუდული რაოდენობა
- საჭიროებს რეზერვუარის ხშირად შევსებას
- ხანგრძლივი მუშაობისას შესაძლოა, ორთქლი არათანაბრად გამოყოს
ორთქლის გენერატორი უთო
ასეთი ტიპის უთო ბევრად უფრო მძლავრია. როგორც წესი, შედგება ორი ძირითადი ნაწილისგან - თვითონ უთოსა და ცალკე მდგომი ორთქლის გენერატორისგან.
ძირითადი მახასიათებლები:
- ცალკე მდგომი გენერატორი დიდი წყლის რეზერვუარით (1-2 ლიტრი)
- სიმძლავრე: 2000-3200 ვატი (ჯამური)
- ორთქლის გამოყოფის ინტენსივობა: 100-180 გ/წთ
- უთოს წონა: უფრო მსუბუქი (0.8-1.2 კგ)
- უწყვეტი მუშაობის დრო: 2-3 საათი
უთო ორთქლის გენერატორის ფუნქციით ბევრად უფრო კომფორტული და მოსახერხებელია, მისი უპირატესობებია:
- უწყვეტად და ინტენსიურად გამოყოფს ორთქლს
- ბევრად სწრაფად აუთოებს
- უმკლავდება ისეთ მძიმე ქსოვილებს, როგორიცაა მაგალითად, ჯინსი, სქელი ბამბა და სხვ.
რაც შეეხება უარყოფით მხარეებს, ერთ-ერთი უპირველესი ნაკლოვანება - ფასია, გარდა ამისა, მისი შეკეთება უფრო რთულია, ვიდრე სტანდარტული უთოს.
უკაბელო ორთქლის უთო
უკაბელო ორთქლის უთო ყველაზე მოსახერხებელი და მარტივად მოსახმარი საოჯახო ტექნიკაა, რომელიც ბოლო დროს უფრო და უფრო პოპულარული ხდება.
ძირითადი მახასიათებლები:
- სიმძლავრე: 1800-2400 ვატი
- წონა: 1.2-1.8 კგ
- ორთქლის გამოყოფის ინტენსივობა: 30-45 გ/წთ
- რეზერვუარის მოცულობა: 250-350 მლ
უკაბელო ორთქლის უთოებს მაღალი მობილობის ფუნქცია აქვთ, ასევე ბევრად უსაფრთხოა მათი გამოყენება, ვიდრე სტანდარტული მოდელის. შესაძლებელია, ნებისმიერ ადგილზე წაიღოთ და გამოიყენოთ მაშინ, როცა გჭირდებათ. აქვთ მოხერხებული, თანამედროვე დიზაინი და დამატებით ე.წ “სმარტ” ფუნქციები. ამ შემთხვევაში, მათი ფასი უფრო მაღალია, თუმცა თუ ხშირად მოგზაურობთ და ასეთი ნივთების ქონა თქვენთვის პრიორიტეტულია, ფასიც ღირს.
ორთქლის უთოს კიდევ ერთი ყველაზე გამორჩეული დადებითი მხარე, ალბათ, ისაა, რომ ქსოვილს არ წვავს, რადგან უშუალოდ არ ეხება, ამიტომ სათუთი და ბუნებრივი ქსოვილების დასაუთოებლადაც გამოდგება, როგორიცაა: აბრეშუმი, ქაშმირი, ნეილონი, შალი და სხვ.
გავრცელებული პრობლემები და მათი გადაჭრის გზები
- უთო არ გამოყოფს ორთქლს
მარტივით დავიწყოთ: ალბათ, ყველას ერთხელ მაინც მოგვსვლია, როცა უთო ჩაგვირთავს, ორთქლი კი არა და არ გამოდის, მაშინვე ვიწყებთ ფიქრს, რომ გაფუჭდა, სინამდვილეში კი უბრალოდ წყლის რეზერვუარია შესავსები.
გარდა ამისა, პრობლემა შეიძლება იყოს: დაგროვილი კირქვა, გაფუჭებული ორთქლის რეგულატორი და მილებში წარმოქმნილი საცობი.
სანამ ხელოსანს უხმობთ, სცადეთ, ეს პრობლემა თავად მოაგვაროთ: გაწმინდეთ უთო კირქვისგან: დააცარიელეთ წყლის რეზერვუარი, შეავსეთ ძმრის და წყლის ხსნარით (1:1 თანაფარდობით), ჩართეთ უთო და დაელოდეთ, სანამ ხსნარი გაცხელდება. გამორთეთ და დატოვეთ ხსნარი რეზერვუარში 30 წუთის განმავლობაში. გამორეცხეთ სუფთა წყლით რამდენჯერმე
გაწმინდეთ ორთქლის “ნახვრეტები: ძირზე: გამოიყენეთ ბამბის ჩხირი ან წვრილი ნემსი მათ გასაწმენდად ისე, რომ ზედაპირი არ დააზიანოთ.
- უთო არ ირთვება
აქ ცოტა უფრო რთულად არის საქმე, შესაძლოა კაბელი იყოს დაზიანებული, ან პრობლემა დენცქვიტაშია.
შეამოწმეთ კაბელი: დაათვალიერეთ ყურადღებით, თუ დაზიანება აღმოაჩინეთ, სპეციალისტმა ის მთლიანად უნდა შეცვალოს.
სხვა შემთხვევაში, შესაძლოა დენცქვიტას ბრალიც იყოს: ჩართეთ სხვა ელექტრო მოწყობილობა იმავე დენის წყაროში, რათა დარწმუნდეთ, რომ პრობლემა ნამდვილად უთოს აქვს.
- უთო წვეთავს ან წყალს ღვრის
მიზეზი შესაძლოა იყოს გადავსებული რეზერვუარი, ტემპერატურის დაბალი რეჟიმი, დაზიანებული სარქველი ან გაბზარული რეზერვუარი.
ამ პრობლემას შედარებით მარტივად, თავად მოაგვარებთ: შეამცირეთ წყლის რაოდენობა და დაიმახსოვრეთ, რომ არასოდეს გადაავსოთ MAX (მაქსიმუმ) ნიშნულს ზემოთ. გაზარდეთ ტემპერატურა, უთო უნდა იყოს საკმარისად ცხელი იმისთვის, რომ წყალი ორთქლად აქციოს. შეამოწმეთ რეზერვუარი, თუ რეზერვუარი გაბზარულია, შესაძლოა საჭირო იყოს მისი შეცვლა.
- უთოს ძირი დაკაწრული ან დაზიანებულია
უთოს ძირის დაზიანება ერთ-ერთი ყველაზე გავრცელებული პრობლემაა, რაც ტანსაცმლის დაუთოების ხარისხზე საგრძნობლად მოქმედებს: შესაძლოა მიიკრას ან ნაკეცები გაუჩინოს ნებისმიერ ქსოვილს.
დაზიანების ძირითადი მიზეზები:
ხშირად, ისე, რომ არც ვაკვირდებით, ღილებიან ტანსაცმელს, ჯინსებს და მეტალის ზედაპირებს გაუფრთხილებლად ვაუთოებთ, ამ დროს კი ძირი იკაწრება ან ფუჭდება. ცალკე პრობლემაა უთოს ჩართულ მდგომარეობაში დატოვება ხანგრძლივი დროით. თუმცა მსუბუქი ნაკაწრების და ზედაპირული დაზიანებების მოშორება მარტივად, აი, ამ ხერხითაა შესაძლებელი:
შეურიეთ სოდა წყალს, წაუსვით ძირს და გაწმინდეთ რბილი ქსოვილით, ფრთხილი, წრიული მოძრაობებით, გაწმენდის შემდეგ, გაასუფთავეთ სველი ხელსახოცით, ან დააყარეთ სუფრის მარილი ალუმინის ფოლგაზე და დააუთოეთ ცხელი უთოთი (ორთქლის გარეშე).
კიდევ ერთი ხერხი ძმრით დამუშავებაა: გაათბეთ ძმარი და დაასველეთ მასში ბამბის ნაჭერი. ფრთხილად გაწმინდეთ დაზიანებული ზედაპირი მაშინ, როცა უთო ჯერ კიდევ თბილია და არავითარ შემთხვევაში ცხელი.
დამატებითი რჩევები:
- არასოდეს დატოვოთ ცხელი უთო საუთაო მაგიდაზე ხანგრძლივი დროით
- დაიმახსოვრეთ, რომ ხარისხიანი უთოს შეძენა თავიდანვე კარგი ინვესტიციაა.
- იმისთვის, რომ უთოს ძირი არ დაააზიანოთ, აუცილებელია, საუთაო მაგიდა ან სპეციალური სადგამი გამოიყენოთ. გარდა ამისა, რეგულარულად გაწმინდეთ უთოს ძირი სპეციალური საშუალებებით და შეიძინეთ სილიკონის დამცავი საფარი ნაზი ქსოვილებისთვის.