როგორ შევარჩიოთ ეზოს ავეჯი - ტენდენციები, რომელიც უნდა გაითვალისწინოთ

ეზოს ავეჯის შერჩევა როგორც წესი, დიდ ხარჯებთან ასოცირდება, თუმცა ყოველთვის ასე არ არის. ალბათ, არაფერი ჯობს საკუთარ ბაღს, რომელიც ნებისმიერ სეზონზე თქვენს საჭიროებებს მოერგება: ზაფხულის ცხელ დღეებში თბილი სიოთი გაგანებივრებთ, ზამთარში კი შეძლებთ, სახლის დატოვების გარეშე ჩაისუნთქოთ სუფთა ჰაერი და დატკბეთ თქვენივე მოწყობილი სივრცით. ამ ბლოგში გიზიარებთ რეკომენდაციებსა და რჩევებს, როგორ შეარჩიოთ ეზოს ავეჯი 2025 წლის ტრენდების გათვალისწინებით.

რა ტიპის ავეჯი გვჭირდება ეზოს მოსაწყობად?

პირველ რიგში, მნიშვნელოვანია, განვსაზღვროთ საჭიროებები, მაგალითად ის, თუ როგორ აპირებთ ეზოს გამოყენებას: წვეულებებისთვის, უფრო მეტად სარეკრეაციო ზონად, სტუმრების მისაღებად თუ განსატვირთად.

სტანდარტული სკამები და სავარძლები - კომფორტული ეზოს მოსაწყობად, საჭიროა დასაჯდომი ადგილები. თუ ექსტროვერტი ადამიანი ხართ და სტუმრები თქვენი სახლის განუყოფელი ნაწილია, ეცადეთ შეარჩიოთ კომფორტული სკამები. შეგიძლიათ აირჩიოთ პლასტმასის, ხის ან ნატურალური რატანის სკამები. რა თქმა უნდა, მასალის მიხედვით ფასი განსხვავებულია.
დასაკეცი სკამები და მაგიდები - იდეალურია პატარა ზომის ეზოებისთვის, სადაც დიდი სივრცე არ არის. თანაც, წვიმისა და უამინდობის დროს მათი ალაგება და დაკეცვა ძალიან მარტივია.
ჰამაკები და საქანელა სკამები - ჰამაკები ბავშვობის ნოსტალგიებს გვიცოცხლებს, როცა ქალაქგარეთ გასულები, მთელი დღის განმავლობაში წიგნით ხელში ვნებივრობდით. რელაქსისთვის და დეკორისთვის საქანელა სკამები იდეალური არჩევანია.
შეზლონგები - ცხადია, ზამთარში არა თუმცა გაზაფხულსა და ზაფხულში საკუთარ ეზოში შეზლონგები აუცილებელია, მზეზე გასარუჯად ან უბრალოდ დასასვენებლად.
პუფები - თუ სტუმრებისთვის არაფორმალური გარემოს შექმნა გსურთ და სკამების რაოდენობა ამოგეწურათ, პუფები მშვენიერი ვარიანტია: მსუბუქია და ადვილად სატარებელი.

თუ საკუთარი ეზოსა და ბაღის ფუფუნება გვაქვს, შეგვიძლია სათავსოებიც ამ სივრცეში მოვაწყოთ ისე, რომ სახლში ათასი რამის შენახვა აღარ დაგვჭირდეს. გამოვიყენოთ დახურული კარადები ბაღის ინსტრუმენტების, ბალიშების, პლედების ან სხვა ნივთების შესანახად. ასევე, გამოგვადგება ღია თაროები - მცენარეებისთვის და დეკორატიული აქსესუარებისთვის.

რომელი მასალით დამზადებულ ავეჯს მივანიჭოთ უპირატესობა?

იმისთვის, რომ ავეჯი გამძლე იყოს და განსაკუთრებით ზამთრის პირობებს გაუძლოს, ისე, რომ თავდაპირველი მდგომარეობა შეინარჩუნოს, აუცილებელია, ავეჯის მასალები სწორად შევარჩიოთ. ეს თავისუფლება მაშინ უფრო გვაქვს, თუ სპეციალურად ჩვენი დიზაინითა და გემოვნებით ვამზადებთ:

ხე - ბუნებრივი და შედარებით ბიუჯეტური მასალა, რომელსაც საოცრად ესთეტიკური აურა შემოაქვს ნებისმიერ სივრცეში. გაითვალისწინეთ, რომ ხის ავეჯი რეგულარულ მოვლას საჭიროებს. წელიწადში ერთხელ მაინც, ხის ავეჯი ზეთით უნდა დამუშავდეს, რათა ფერი და ვიზუალი შეინარჩუნოს.
პლასტმასი - ყველაზე ბიუჯეტური ვარიანტი თქვენი ავეჯისთვის. მისი უპირატესობა იმაში მდგომარეობას, რომ მსუბუქია, ადვილად შეგიძლიათ გადაიტანოთ ეზოს ნებისმიერ წერტილში, წყალგამძლეა და პირიქით - არც მზის სხივები აფუჭებს.
ლითონი - ლითონისგან დამზადებული ავეჯი ბევრად უფრო გამძლე და მყარია, უძლებს ნებისმიერ ამინდს, თუმცა შესაძლოა, მეტად ძვირი ღირდეს.
რატანი - ნატურალური რატანით დამზადებული ავეჯი დღეს ბაზარზე საკმაოდ პოპულარულია. არ საჭიროებს განსაკუთრებულ მოვლას და კარგად ინახება ზამთრის უამინდობის პირობებშიც.

დეკორაციები, რომლებიც ეზოს გაგვილამაზებს

მხოლოდ ავეჯით, ცხადია, თქვენს ეზოს ისეთ იერსახეს ვერ მიანიჭებთ, რომ ბოლომდე ისიამოვნოთ და კარგი აურა შეიქმნათ. თანაც, დეკორატიული ნივთები და მცენარეები ირგვლივ ყველაფერს განსაკუთრებულ ხიბლს სძენს.

შეეცადეთ, შეიძინოთ მზის ენერგიაზე მომუშავე ნათურები, რომელიც უშუქობის პერიოდში თქვენი გაჭირვების ტალკვესი გახდება
ფარნები და სხვადასხვა ფორმის, ფერისა და სურნელის მქონე სანთლები - საღამოს საათებში, მაშინ, როცა სტუმრებისთვის სასიამოვნო გარემოს შექმნა გინდათ, სანთლები იდეალური ვარიანტია
გარე ხალიჩები და პლედები - 2025 წლის ერთ-ერთი ყველაზე მოთხოვნადი და ტრენდული აქსესუარი გარე სივრცისთვის სწორედ ხალიჩებია. გამძლე, მოდური და ეკოლოგიურად სუფთა. ამ მიმართულებით, ბაზარზე პოლიპროპილენის სინთეზური ბოჭკოებით დამზადებული ხალიჩები და ზოგადად, ავეჯი ლიდერობს. ხალიჩებისთვის ინსპირაციად შეგიძლიათ გამოიყენოთ ბოჰო სტილი,
რომელიც წელს საკმაოდ აქტუალურია, განსაკუთრებით ზაფხულში. გარდა ამისა,
გარე ხალიჩებს ინდივიდუალურ იერსახეს ანიჭებს ბუნებრივ მოტივებზე აგებული ორნამენტებიც.
არ დაგავიწყდეთ, რომ ინდივიდუალიურ სივრცეში თქვენი შტრიხები აუცილებლად უნდა შეიტანოთ. ამაში შედის ხელნაკეთი დეკორაციები და ძველი ნივთები, რომლის განახლებაც უკვე დიდი ხანია გინდათ და თავი ვერ მოაბით. იქნება ეს კერამიკის ჭურჭელი, მინი ქანდაკებები თუ ლარნაკები, აუცილებლად მიეცით მათ „ახალი ცხოვრება“.

რა ფერის ავეჯი ჯობს ეზოსთვის?

2025 წელს, მინიმალისტური დიზაინის ავეჯი კიდევ უფრო აქტუალურია. თეთრი, ბეჟი და ღია ნაცრისფერი გარე ავეჯისთვის უნივერსალური ფერებია. ისეთი, ნებისმიერ ავეჯის ტიპს რომ უხდება. თუმცა უნდა იცოდეთ, რომ 2025 წლის ტრენდულ ფერებს შორისაა მწვანე, აგურისფერი, ლურჯის ტონალობები, თბილი, ნეიტრალური ფერები და დამჯდარი ყვითელი.