შევარჩიოთ სამზარეულოს გამწოვი - რჩევები

გამწოვი მართალია სხვა ფორმით, თუმცა რაც არ უნდა გასაკვირი იყოს, უძველესი დროიდან არსებობს. 21-ე საუკუნეში, ტექნოლოგიების განვითარებასთან ერთად, დაიხვეწა როგორც მისი დიზაინი, ასევე ფუნქციები, თუმცა მოვლა და გაფრთხილება ყველაფერს სჭირდება და არც სამზარეულოს ტექნიკაა გამონაკლისი.

გამწოვის მოვლისთვის საჭირო რჩევებამდე, გაგიზიარებთ ინფორმაციას, რა ტიპის გამწოვები არსებობს და როგორ შევარჩიოთ საუკეთესო მოდელი ჩვენი სამზარეულოსთვის.

გამწოვის შექმნის ისტორია

გამწოვის ყველაზე ადრეული მოდელი 1926 წელს, თეოდორ გერდესმა შექმნა. თუმცა, მანამდე, უძველესი დროიდან, მაშინ, როცა ადრეული ცივილიზაციები საჭმლის მოსამზადებლად ცეცხლს იყენებდნენ, საკვამურებისა და სავენტილაციო ხვრელების კონცეფცია არსებობდა.

დროთა განმავლობაში, ევროპული სამზარეულოს განვითარებასთან ერთად, დაიხვეწა საკვამურებისა და ვენტილაციის სხვა საშუალებები, რაც კვამლისა და ორთქლის ბევრად უფრო კარგ მართვას უზრუნველყოფდა.

1920-1930-იან წლებში კი ისეთი მოწყობილობები შეიქმნა, რომლებიც როგორც წესი, კარადებსა და სათავსოებში იყო დამონტაჟებული, თანაც იმდენად ხმაურიანი და დღევანდელ სტანდარტებთან შეუსაბამო იყო, რომ იმას, რაც ახლა ნებისმიერ სამზარეულოში გიდგათ, ვერც კი შევადარებთ.

დღეს უკვე გამწოვებს ისეთი გაუმჯობესებული ფუნქციები აქვთ, როგორიცაა Led ნათურა, სენსორული მართვა, რეჟიმებზე ავტომატური რეაგირება და ჭკვიან სახლთან ინტეგრირება. ამასთან, გაუმჯობესებულმა ფილტრაციის სისტემებმა, როგორიცაა ნახშირბადისა და Hepa ფილტრების გამოჩენამ, მნიშვნელოვნად გააუმჯობესა გამწოვების ეფექტურობაც.

ახლა ტრადიციული, სტანდარტული გამწოვიდან დაწყებული, თანამედროვე სამზარეულოში ლამის შეუმჩნევლად ინტეგრირებული მინიმალისტური დიზაინით დამთავრებული, ყველანაირი ტიპისა და ფასის გამწოვის ყიდვას შეძლებთ.

გამწოვის ტიპები და მათი მახასიათებლები

კედლის გამწოვი სხვა მოდელებთან შედარებით, ყველაზე ბიუჯეტურია. როგორც სახელი გვეუბნება, კედელზე მონტაჟდება, ჰაერგამტანი მილი კი სპეციალურ ფოლადის ხუფში იმალება. როგორც წესი, აქვთ მაღალი სიმძლავრე და მრავალფეროვანი დიზაინი, რაც არჩევის საშუალებას გიმარტივებთ.
ჩამოსაკიდი გამწოვები დახვეწილი და თანამედროვე დიზაინით გამოირჩევა. მისი სენსორული მართვის სისტემა და პულტით კონტროლი დამატებითი კომფორტისთვისაა განკუთვნილი.
ბუხრისებრი გამწოვი თითქმის ყოველთვის ერთ, კლასიკურ დიზაინშია დამზადებული და ტრადიციული სტილის სამზარეულოებში მეტად იყენებენ. იდეალური ვარიანტია დიდი სამზარეულოებისთვის, რადგან მაღალი სიმძლავრე და დაფარვის ფართო არეალი აქვს,
ცალკე მდგომი გამწოვი შესაძლოა, ნებისმიერ ადგილას განთავსდეს, რადგან არც კედელზე მიმაგრებას ან კუნძულის ჭერზე დამონტაჯებას საჭიროებს. ამ ტიპის მოდელები იდეალურია დროებითი გამოყენებისთვის.

როგორ მოვუაროთ გამწოვს, რომ დიდხანს გაგვიძლოს

როგორი კარგი, ძვირადღირებული და ხარისხიანი მოდელიც არ უნდა იყოს, ნესტიან ადგილზე დამონტაჟებულ ტექნიკას განსაკუთრებული მოვლა სჭირდება, რაც თქვენი გამწოვის სიცოცხლეს გაახანგრძლივებს და მის ეფექტურ მუშაობასაც უზრუნველყოფს.

ფილტრები, რომლებიც ცხიმსა და ჭუჭყს იჭერს, რეგულარულად, 2-4 კვირაში ერთხელ უნდა გაწმინდოთ. მოათავსეთ ისინი თბილ წყალში ან თუ მოგეპოვებათ, ჭურჭლის სარეცხ მანქანაში. თუ ამჩნევთ, რომ ფილტრები ძალიანაა დაბინძურებული, დაამატეთ სოდა, ლიმონი ან სპეციალური გამწმენდი საშუალება.
შეარჩიეთ საწმენდი იმის მიხედვით, რომელი ზედაპირის გამწოვიც გაქვთ. უჟანგავ ფოლადს სხვა ხსნარი სჭირდება, მინის ზედაპირებს - სხვა.
ხშირად, როცა საჭმელს ვამზადებთ, ვერც კი ვხვდებით, ცხიმით როგორ ისვრება ვენტილატორის ფრთები, სანამ მთლიანად გამწოვის წმენდის დღე არ მოვა. არავითარ შემთხვევაში ფრთებზე დაგროვილი ცხიმი უყურადღებოდ არ დატოვოთ და არ დაელოდოთ 4 კვირას მათი დასუფთავებისთვის.
შეამოწმეთ, რომ ყველა განათება გამართულად მუშაობდეს. თუ რომელიმე გამოსაცვლელია, გამოცვალეთ დროულად.
წელიწადში ერთხელ, სრული შემოწმებისა და ხარვეზების პრევენციისთვის, მოიყვანეთ სპეციალისტი, რომლებიც მიუდგომელ ნაწილებს გაწმენდენ და შეამოწმებენ, რამდენად გამართულად მუშაობს თქვენი გამწოვი სამზარეულოში.

შევარჩიოთ ჩვენთვის სწორი მოდელი - რჩევები

იმისთვის, რომ გავიგოთ, რა სიმძლავრის გამწოვი დაგვჭირდება ჩვენი სამზარეულოსთვის, ერთი ასეთი ხრიკი არსებობს: გაამრავლეთ სამზარეულოს მოცულობა (სიგრძე x სიგანე x სიმაღლე) 10-ზე.

სიმძლავრესთან ერთად, გაითვალისწინეთ ხმაურის დონეც. თუ იშვიათად გიწევთ კერძების მომზადება და შესაბამისად, გაზქურას ნაკლებად იყენებთ, სამაგიეროდ ალტერნატივად აეროგრილი გაქვთ, რომელსაც დიდად არ სჭირდება გამწოვის დახმარება, შეგიძლიათ, სტანდარტული, დაბალი ფასის გამწოვი შეიძინოთ.

თუ ეს ყველაფერი პირიქითაა, მაშინ აუცილებელია, დაახლოებით, 40-50 დეციბელის მქონე გამწოვი შეარჩიოთ, რომლის ხმაურიც მთელი დღის განმავლობაში არ შეგაწუხებთ.

ასევე, დააკვირდით, რომ თანამედროვე გამწოვები Led განათებითაა აღჭურვილი, რადგან როგორც წესი, ასეთი ნათურები ნაკლებ ენერგიას მოიხმარს.

რაც შეეხება გამწოვის მაღალ წარმადობას - უზრუნველყოფს სუფთა ჰაერს ნებისმიერი კერძის მომზადების შემდეგ, არასასიამოვნო სუნი კი ოთახში პრაქტიკულად აღარ დგება.

21-ე საუკუნეში, გამწოვებს მრავალფეროვანი მართვის პანელი აქვთ, გამწოვის „თაიმერი“ საშუალებას იძლევა, გარკვეული პერიოდი კვლავ იმუშაოს კერძის მომზადების შემდეგ, რაც ჰაერს კიდევ უფრო წმენდს და ფილტრავს. ამიტომ, დარწმუნდით, რომ თქვენს შერჩეულ მოდელს ეს ფუნქციაც ექნება.

აქსესუარები, რომლებიც გამწოვის მოვლას გაგიმარტივებთ

ნახშირბადის ფილტრები - უფრო გამძლეა, ვიდრე ალუმინი, თანაც, საშუალებას აძლევს 99.8% გაფილტრული ჰაერის გამოსვლას.
HEPA ფილტრები პატარა ნაწილაკებისთვის შესასრუტად.
საწმენდი ხსნარის ნაკრები - მაგ: სპეციალური სპრეი უჟანგავი ფოლადის ზედაპირისთვის. აგრეთვე, დაგჭირდებათ ცხიმის მოსაშორებელი საშუალებები ფილტრებისა და გამწოვის ფრთებისთვის.