ყველაფერი, რაც პოლიკარბონატის შესახებ უნდა იცოდეთ

პოლიკარბონატი უბრალოდ პლასტმასი არ არის, არამედ ინოვაციური მასალა, რომელიც აერთიანებს სიმტკიცეს, გამჭვირვალობასა და თერმომდგრადობას. იგი დღითი დღე უფრო მეტად გამოიყენება თანამედროვე არქიტექტურასა და ზოგადად, სამშენებლო ინდუსტრიაში.

ამ ბლოგში მოგიყვებით:

• რა არის პოლიკარბონატი და როგორ მიიღეს ის;
• სად და როგორ გამოიყენება;
• მისი ძირითადი სახეობები;
• ტექნიკური მახასიათებლები;
• მოვლის რჩევები და ექსპლუატაციის ვადები;

პოლიკარბონატის წარმოშობა და შემადგენლობა

პოლიკარბონატი არის თერმოპლასტიკური პლასტმასი, რომელიც მიიღება ბისფენოლ A-ისა და ფენოლ-აცეტონის ნაერთის სინთეზით. მასალა პირველად და დამოუკიდებლად შეიქმნა 1953 წელს, ორი მეცნიერის, გერმანელი გერმან შნელისა და ამერიკელი დენიელ ფოქსის მიერ.

მასალის სამრეწველო წარმოება დაიწყო 1976 წელს ისრაელში, როდესაც პოლიკარბონატი პირველად გამოიყენეს სათბურების გადასახურად უჯრედოვანი, გამჭვირვალე ფურცლის სახით.

სად გამოიყენება პოლიკარბონატი?

პოლიკარბონატი გამოიყენება როგორც კონსტრუქციული მასალა, განსაკუთრებით იმ ადგილებში, სადაც საჭიროა გამჭვირვალეობა, სიმტკიცე და მსუბუქი წონა. რაც იმას ნიშნავს, რომ მოთხოვნადია:

• მშენებლობასა და არქიტექტურაში: გადახურვები, კარვები, ვიტრაჟები, ფასადები;
• სათბურებსა და აგრარულ სექტორში: უჯრედოვანი ფურცლები განათებისთვის;
• დუშკაბინებისა და შიდა ტიხრებისთვის: ვინაიდან, წყალგამძლე, გამჭვირვალე და მსუბუქია;
• უსაფრთხოებისთვის: მაგალითად, შენობისდაცულიმინებიდაპოლიციის მანქანის ფარები
• ტექნოლოგიასა და წარმოებში: კომპაქტ-დისკები, კომპიუტერის კორპუსები;
• განათების სისტემა: თუნდაც, ავიღოთ დიოდური განათების დეტალები;
• სატრანსპორტო საშუალებები: თვითმფრინავების ფანჯრები, მანქანის ნაწილები.

პოლიკარბონატის სახეობები

როგორც ხედავთ, პოლიკარბონატი საკმაოდ ფართოდ გამოსაყენებელი მასალაა. მის სახეობებს შორისაა:

1. მონოლითური პოლიკარბონატი

• ერთიანი, გამჭვირვალე ფურცლები;
• ვიზუალურად ძალიან ჰგავს მინას, მაგრამ ბევრად უფრო მსუბუქი და მტკიცეა;
• გამოიყენება ვიტრაჟებში, პანორამულ ფანჯრებში, ბარიერებსა და შედარებით დაცულ კონსტრუქციებში

2. უჯრედოვანი პოლიკარბონატი

• შედგება რამდენიმე თხელი ფენისგან, რომელიც ჰაერის ფენითაა გაყოფილი;
• შესანიშნავი თბოიზოლატორია, ამიტომ ხშირად გამოიყენება სათბურებსა და გადახურვებში;
• მსუბუქი, მოქნილი და ძალიან გამძლე

როგორ მოვუაროთ პოლიკარბონატს?

მიუხედავად იმისა, რომ პოლიკარბონატი გამძლე მასალაა, მის შენარჩუნებასაც სჭირდება სწორი მოვლა:

1. არ გააწმინდოთ უხეში ღრუბლით ან აბრაზიული საშუალებებით - რადგან შესაძლოა, დაზიანდეს ზედაპირი და ვერცერთი საშუალებით ვეღარ აღადგენთ;
2. გამოიყენეთ რბილი ქსოვილი და თბილი წყალი - სუფთა წყალი ხშირად საკმარისია მასალის ბზინვარების შესანარჩუნებლად;
3. არ გამოიყენოთ ალკოჰოლი და ამიაკი - შეიძლება მასალა სრულად გათეთრდეს და პირვანდელ სახეს აღარ დაუბრუნდეს;
4. მინიმუმ წელიწადში ერთხელ, გაწმინდეთ უჯრედოვანი პოლიკარბონატის არხები, რათა თავიდან აიცილოთ ობისა და ბაქტერიების დაგროვება;
5. დაიცავით UV ფენა - პოლიკარბონატების უმრავლესობას, აქვთ ულტრაიისფერი ფენა მხოლოდ ერთ მხარეს. მონტაჟისას დარწმუნდით, რომ ის ფენა გარეთაა მოქცეული რათა დაიცვათ და გაუფრთხილდეთ მას.

პოლიკარბონატის მახასიათებლები, რომლებიც აუცილებლად უნდა იცოდეთ

პოლიკარბონატი იმ იშვიათ მასალათა რიგს მიეკუთვნება, რომელიც აერთიანებს სიმტკიცეს, ელასტიურობასა და გამჭვირვალობას. მისი სიმკვრივე საშუალოდ 1.2 გრამია თითოეული კუბური სანტიმეტრისთვის, რაც მნიშვნელოვნად ამცირებს მის წონას, განსაკუთრებით მაშინ, როცა არჩევანი მინას და პოლიკარბონატს შორის უნდა გააკეთონ. მასალა იძლევა საშუალებას, შეიქმნას მსუბუქი, მაგრამ მტკიცე კონსტრუქციები.

პოლიკარბონატის ერთ-ერთი ყველაზე გამორჩეული თვისება ისაა, რომ მასალა არ ტყდება და არ კარგავს ფორმას ძლიერი ზეწოლის ან გარე ძალის ზემოქმედების დროს. დარტყმისას მისი ენერგიის შთანთქმის უნარი აღემატება 20 კილოჯოულს, რაც პრაქტიკულად უვნებელს ხდის მას ყოველდღიური დარტყმებისა და დაზიანებების მიმართ.

თერმომედგომობის თვალსაზრისით, პოლიკარბონატს ნამდვილად არ აქვს კონკურენტი. მისი დარბილების ტემპერატურა 220-230°C-ია, ხოლო მუშაობის რეჟიმში შეუძლია გაუძლოს 50°C-დან +120°C-მდე ტემპერატურას ყოველგვარი მახასიათებლების ცვლილების გარეშე. სპეციალურ ინდუსტრიულ პირობებში დამუშავებისას, მას თერმული გამძლეობა +280°C-დან +310°C-მდე აქვს, რაც იდეალურს ხდის მას სხვადასხვა მაღალი ტემპერატურის გარემოში გამოსაყენებლად.

კიდევ ერთი ძლიერი მხარეა ის, რომ გამჭვირვალე ვარიანტებში იგი გადმოსცემს შუქის დაახლოებით 90%-ს, რაც ძალიან ახლოს დგას ჩვეულებრივ მინასთან. ამავდროულად, პოლიკარბონატი ბევრად უსაფრთხოა: იგი არ იმსხვრევა, არ იფშვნება და ამის გამო, ადამიანისთვის საშიშროებას საერთოდ არ წარმოადგენს.

მასალა კარგად ინახავს სითბოს და იდეალურია როგორც სათბურების, ასევე ენერგოეფექტური შენობების გადასახურად. თბოგადაცემის კოეფიციენტი კი მერყეობს 1.4-დან 4.1-მდე, ფურცლის სისქისა და სტრუქტურის მიხედვით.

გარდა ამისა, მას გააჩნია ცეცხლმედეგობის B1 კლასი, რაც ნიშნავს, რომ იგი თვითაალებას მოკლებულია და არ ავრცელებს ცეცხლს სწრაფად, რაც განსაკუთრებით გამოსადეგია საცხოვრებელი ან საზოგადოებრივი შენობებისთვის. ამ ყველა სიკეთესთან ერთად, რაც მის მახასიათებლებს შორისაა, პოლიკარბონატი არ იბერება, არ დეფორმირდება და არ ზიანდება ტენიან გარემოში.

და ბოლოს, აქვე აუცილებლად უნდა აღინიშნოს, რომ პოლიკარბონატის ექსპლუატაციის ვადა მინიმუმ 10 წელია, თუმცა სწორი მოვლის პირობებში მასალა შეგიძლიათ გამოიყენოთ ორჯერ ან სამჯერ უფრო მეტ ხანსაც კი.